I was so scared’: Kim Chiu naiyak nang ikuwento ang van ambush

Emosyonal na ibinahagi ng aktres na si Kim Chiu ang naging karanasan matapos paulanan ng bala ang sinasakyan niyang van habang papunta sa taping ngayong umaga ng Miyerkoles.

Sa eksklusibong panayam ng ABS-CBN News, mangiyak-iyak na sinalaysay ni Chiu ang mga nangyari noong araw na iyon, na normal lang dapat na taping day para sa aktres.

“Natutulog lang ako. Dapat magbabasa ako ng script pero inantok ako along the way palabas ng village so humiga ako. So kung hindi ako inantok, tinuloy ko ‘yung pagbabasa ng script, siguro tinamaan na ako. Nagpaulan ng bala, eight bullets. Nakita ko ‘yung isang bala nasa windshield nakapatong. I’m scared,” ani Chiu.

Nagising na lang siya sa tunog ng bala at agad na pinuntahan ang kaniyang drayber at personal assistant.

“Maliit lang yung putok eh. Manipis lang siya na tunog tapos sabi ko ano yon anong nangyari so nagpunta ako sa driver and PA ko and then sabi nila nabaril yung kotse. so tiningnan ko silang dalawa. ‘Yong driver ko yung windshield namin butas na ang bala,” ani Chiu.

Batay sa ulat ng pulisya, patungo sana si Chiu sa taping ng kaniyang serye na “Love Thy Woman” nang paulanan ng bala ang kaniyang sasakyan.

Aabot sa 8 sunod-sunod na tama ng bala ang tumama sa sasakyan, ayon sa aktres.

Nanatili sa loob ng sasakyan si Chiu habang sinusuri ng pulisya ang crime scene. Agad din daw siyang tumawag sa mga mahal sa buhay makalipas ang insidente.

“Tumawag ako na binaril ‘yung kotse ko. Ang dami kong tinawagan kasi hindi ko alam anong gagawin ko. Nasa loob ako ng sasakyan, ang daming pulis sa labas. May mga MMDA na. Hindi ko na alam. After that, nag-hang ako,” ani Chiu.

Gayunman, pinili pa rin ni Chiu na pumunta sa taping ng kaniyang palabas.

“Nag-take ako ng dalawang eksena. Siguro adrenaline rush na mag-taping tayo, magtrabaho tayo. People are asking me kung kumusta ako. Hindi ko alam. Tinatanong nila kung kumusta ka. Naisip ko, ‘Oo nga no? Kumusta pala ako.’ Natatakot lang ako why those things are happening,” ani Chiu.

Palaisipan din sa aktres sa motibo ng krimen, lalo na’t iginiit nito na wala siyang naging kaalitan.

“Diyos ko, ako pa ba? Wala [akong nakasamaan ng loob]. Ang masasabi ko na lang, life is really precious. Kahit wala kang sakit, wala kang kasamaan ng loob. Kung natamaan ka ng balang iyon, siguro wala ka na,” ani Chiu.

“Mistaken identity” ang isa sa tinitingnang anggulo sa insidente, ayon kay QCPD director Brig. Gen. Ronnie Montejo.

Kumbinsido rin si Montejo na intensiyon ng gunman na pumatay sa insidente.

Ikinalugod naman daw ng aktres na ligtas ang lahat ng sakay ng sasakyan. Nagpasalamat din si Chiu sa mga nagpaabot ng mensahe sa kaniya makalipas ang insidente.

“I am very happy and very thankful na more than 100 messages ‘yung natanggap ko. ‘Yung cellphone ko endless ‘yung tawag. Safe naman ako. Nagpapasalamat ako dahil nag-alala sila para sa akin. Sana makita na kung sino ang bumaril sa kotse ko,” ani Chiu.

Nagpakonsulta na rin sa abogado si Chiu at nakipag-ugnayan sa mga opisyal ng ABS-CBN kaugnay ng imbestigasyon.